Johresbricht vor Presidenti 2011
Ds Johr 2011 isch düre,
i nime no einisch di auti Agenda füre.
Sofort gsehni, viel isch wieder abgange,
äs isch nämlech viel drinne gstange.
Mit dr erschte Turnstung fo i grad a,
Fit mit Käthy tuet do drufe stah.
Wo ds Käthy Durchschnittauter vo üs Froue het usgrächnet gha,
het si gfunge, mit dene Froue cha ni nid grad z’gäi dra.
Mir müesse chli rüehiger is nöie Johr starte,
i cha doch do nid scho weis nid was erwarte.
Drum tuet üs ds Käthy chli schone,
u tuet üs mit äre Lektion Autersturne belohne.
Merci Käthy, di Turnstung isch sehr gmüetlech gsi,
u mir hei doch viu chönne lache derbi.
Z’letscht tüe mir mit em nä Cüpli zäme ha,
u stosse mitenang ufs nöie Johr a.
Mitti Jänner isch GV uf em Programm stange,
mir si wieder nach Brunnenthal is Dorfbeizli gange.
Grad vier Froue chöi hür jubiliere,
beidi Brigitte, ds Fränzi u i chöi 20 Johr fiiere.
Dr erscht Teu isch schnäu verbi gsi,
umso länger isch me de im zwöite Teu bliebe si.
Im erschte Quartal vom Johr, näbscht de übleche Turnstunge,
hei ou wieder spezielli Tätigkeite stattgfunge.
I dänke do a Winternachtspaziergang, as Cörle oder a nä gmüetlech Jass,
das macht üs Froue haut ou gäng viu Spass.
Im Märze isch de Ski-week-end in Gräche agstange,
do tüe di meischte aube scho lang druf plange.
Mir geits gwüss aube ou ä so,
aber leider hani das mou nid chönne mitcho.
Mit ere Grippe im Näscht bini gläge,
u ha haut das Ski-week-end müesse absäge.
Am Bricht a, u vom ghöre säge,
heit Dir Froue chönne äs schöns Wucheänd erläbe.
Für d’Organisation Christa merci viu mou,
i hoffe, i sig de fit bim nöchschte Mou.
Drü mou im Johr gits ä grosse Batze i Vereinskasse,
dr Messemärit-Stang darfsch eifach nid verpasse.
Ä grossi tröii Stammkundschaft hei mir chönne ufboue i de letschte Johre,
das louft auso mängisch grad wine Mohre.
Ä grosse Dank a öich aui, dass mir di Gescht gäng chöi zfiede steue,
äs isch schön z’wüsse, das me uf jedes vo öich cha zeue.
Öppis erfröilechs hei mir im April vernoh,
d‘Lisa Eberhard isch uf d’Wält cho.
Dir Karina no einisch härzlechi Gratulation vo üs aune,
u mir hoffe mir gseh di scho gli wieder ir Haue.
Vom April u Meie chunnt mir i Sinn,
eifach Training, Training, Training.
Die nöie Fit und Fun-Spieli isch ä Herusforderig für üs Froue,
u ds Leiterteam het i üs grosses Vertroue.
Die Spieli tüe würklech aune sehr guet gfaue,
o we mir dr Ablouf nümme so schnäu tüe schnaue.
Wie immer Mittwuch vor Uffahrt isch dr Gländlouf agseit,
das Jahr breichts uf ä 1. Juni, u mir hoffe das äs nid seicht.
Aber dr Wättergott isch nid grad uf üser Site gstange,
äs schiffet u isch gwüss ganz verhanget.
Ei Vorteil hets für üsi Gländloufstrecke,
mir chöi de aube viu besser d’Fähndli i stecke.
Aber genau uf d’Renne häre tuets mit em Rägne ufhöre,
obwohls zwar die meischte Löifer garn nüt tuet störe.
Mir hei ömu wieder ä grossi Teilnehmerzahl gha,
und uf öich Froue het me sech wie immer beschtens chönne verla.
So isch dä Alass ou wieder super glunge,
u am Fürobe hei mir de ar Edith no aui z’Happy Birthday gsunge.
Merci Froue für öier Isätz,
dir sit eifach aui riese Schätz.
Ohni grossi Pouse ischs im Juni grad witergange,
äs vierzger Geburifescht isch agstange.
Vor Edith hei mir ä Iladig dörfe entgäge näh,
u mir hei üs überleit was me ihre äch so chönnt gäh.
Ds Fränzi het usegfunge, ä Liegistuhl würd ihre no fähle,
u so mit vierzgi tüe mir ihre ou chli Ruh empfähle.
Zur Ungerhautig het Marianne u ds Käthy ds ABC DRS 3 Frogespiel moderiet,
u d’Edith het gwüss bi de meischte Froge brilliert.
Leider si d’Liederwünsch dr Schneewalzer, Zwei rehbraune Augen und am blauen See,
bim Radio DRS 3 im Archiv niene meh.
So hei mir haut kurzfrischtig vier Froue vom Verein ufbote,
die 3 Volksstück mit dr Handorgele z’uebe nach Note.
Die nöii DTV-Husmusig isch bi de Geburigescht guet acho,
si hei vei echlei Applaus übercho.
Liebi Edith, no einisch ganz härzleche Dank,
für das schöne Fescht und Spis und Trank.
Äbefaus seeländische Turnfescht in Grossaffoutere gö mir go bsueche,
mir wei dert doch di nöie Fit- und Fun Spieli versueche.
Im nöie grüne Trainer hei mir üs dert dörfe presentiere,
u bi däm Schisswätter ou aui passende Accesoires drzu chönne probiere.
Eis isch klar, Spass hei mer wieder aui gha a däm Fescht,
u jedes het wieder gäh sis Bescht.
Obwohls für nä Rangierig vor iche nümme tuet länge,
ischs schön das mir am ne Turnfescht teil näh u üs astränge.
Mit em nä gmüetleche Grillobe z’Iffwil obe hei mir d’Summerferie iglüte,
wo für üs jo aui ou öppis bedüte.
Brigitte König, merci no einisch für diner feine Spände a däm Alass,
u für d’Organisation, äs het gmacht mega Spass.
So 5 Wuche Summerferie tüe lang go,
zum Glück isch do no ä Iladig zum nä Geburifescht cho.
D’ Susi Frésard cha ou ihre 40. Geburi fiiere,
do drzu möcht i dir no einisch gratuliere.
D’Iladig für i Pfarrschüür zu däm feine Apero,
hei mir natürlech sehr gärn a gnoh.
Du hesch dörfe mit dine Gescht üsi DTV-Spieli mitmache,
i Form vo Stafette die verschiedenschte Sache.
Zum Bischpiel wär am meischte Wasser cha zämetrage uf Zyt,
Gummistiefu wärfe müglischt ganz wyt,
oder Chrömli ganz schnäu ässe,
u derby nid vergässe,
Sieger isch ersch dä wo schnäuer cha pfiffe ganz lut,
nid öppe dä wo aschtändiger tuet.
No meh Spieli i der Währig hei mir gmacht zum Lache,
u d’Lüt hei ou guet ghuffe mitmache.
Merci viu mou Susi für das luschtige Fescht,
schön das mir hei dörfe si diner Gescht.
Mitti Ougschte het ä Delegation vom DTV am Jekami-Schiesse teil gnoh,
u tatsächlech heisi grad ir Gruppe Plousch dr 1. Pris gnoh.
Schiesse geit haut ou chli ringer aus umeseckle,
somit hei di Froue ä nöii Sportart chönne entdecke.
Schön isch doch, dass me bi de angere Dorfaläss ou no Zyt tuet finge,
u dene Vereine ou öppis i Kasse tuet bringe.
Im schöne Herbschtmonet Septämber,
steit bi üs DTV-Reis uf em Kaländer.
Ds Ziel isch vom Loufental is Leymental ds‘ cho,
u d’Regula u Cornelia hei d’Organisation übernoh.
Bi schönschtem Wätter träffe mir Froue z’Bätterkinge am Bahnhof i,
u dert stiege mir Richtig Solothurn, u när gäge Loufe i.
Im Zug het jedi vo üs Froue äs Päckli übercho,
aber uftue darfsch ersch wenn d’Reiseleitig git ihres Kommando.
Jedi tuet scho überlege u studiere,
was äch de mit dene Päckli söu passiere.
In Loufe hei mer de di erschti Pouse,
für näs Käffeli u chli öppis schnouse.
Witer geits de mit Stägetritte ds‘ düruf,
u das nimmt üs de scho vei echlei dr Schnuf.
Aschliessend geits witer mit ere schöne Wanderig wo mir ungerwägs ou chöi üses Picknick ässe,
u när geits zum Schlussufstieg wo mir natürlech ou nid so schnäu vergässe.
Ändlech bi däm Metzerlenchrüz acho,
het me ds erschte Päckli ufto.
Füre cho isch ä feini Fläsche Kirsch us em Schwarzbuebeland,
u aui Froue nä usem Ruchsack sofort ihres DTV-Glas zur Hand.
Mit em nä Schlückli Kirsch tüe mir üsi Gläser zämeha,
u stimme drzu no üses DTV-Liedli a.
Witer geits nach Mariastei wo mir iträffe uf di Viere,
u im Hotel zur Poscht tüe mir üs i quartiere.
Ir schöne Gartewirtschaft näh mir dr verspätet eufi Schuss i,
u tüe zäme no chli si.
Witeri Päckli wärde ufto,
natürlech nume uf ds Kommando.
Zum Bischpiu, d‘ Rückemassage git üs aune grad gueti Luune,
di angere Gescht chöme grad nume no is stuune.
Die Päckliüberraschig isch dr Reiseleitig würklech glunge,
wär Karte schriebt het me so ou grad gfunge.
Nach em ne feine Nachtässe gö äs paar Froue,
di nochglägnegi Sternwarte go gschoue.
Die angeri Gruppe geit no chli ds Mariastei go umeschuene,
u tuet dä schön Gjät- eh Chrütergarte bestuune.
Zum nä Schlummertrunk si de wieder aui zäme cho,
bevor me de is Bett tuet go.
Am Morge hei mir de äs feins Z’Morge ir Gartewirtschaft übercho,
u di wo hei wöue hei dörfe zur Messe go.
Gmeinsam loufe mir dr Burg Landskron entgäge,
die liegt in Frankrich u isch wunderschön gläge.
Nach dr Besichtigung gits im Burggarte,
witeri Päckli zum uftue, mir chöis chuem erwarte.
Äs Tischtuch, Serviette, Mikrofon u Servierschöibe si füre cho,
äs isch wieder Zyt für näs Apero.
Di Froue wos für nä Job breicht het, hei dä Uftrag super usgführt,
u üs dä fein Elsässer Wy i de DTV-Gläser serviert.
Drufache hei mir im Dörfli Flüh no zäme äs Mittagässe gnoh,
bevor mir scho wieder müesse gäge heizu go.
Ar Regula u ar Cornelia für d’Organisation ganz äs härzlechs Dankeschön,
di Reis isch gsi eifach wunderschön.
Im Oktober foht ds Muki u ds Kitu wieder a,
mir hei ou hür wieder viu Amäudige gha.
Aune Leiterinne härzleche Dank, dass Dir nech die Zyt tüet näh,
u dene Ching am Turne so viu Fröid chöit gäh.
Im Novämber steit wie immer dr Lottomach a,
u do müesst Dir Froue ou gäng wieder dra.
Danke aune zäme wo do gäng ä Isatz tüe mache,
mir heis haut ou gäng luschtig u chöi viu lache.
Dr Chlausehöck us letschte Vereinsalass,
dä macht haut ou immer sehr viu Spass.
Träffe tüe mir üs z’Balm bim Schützehüsli,
äs chutet u strubuset gar grüsli.
Aber ds OK het vorusse no äs Zäut ufgsteut, das mir si am Schärme,
u bim nä feine Glühwy hei mir üs prächtig chönne erwärme.
Zum Ässe hets äs feins Fondue gäh,
wo mir hei dörfe zuenis näh.
Aschliessend ir Schwitzstube (Schützestube) inne,
het me bim nä Quiz chönne schöni Prise gwinne.
Plötzlech klopf, klopf u dr Samichlous mit em Schmutzli steit vor dr Tür,
u üs isches zum Teil nümme so ghür.
Si näh doch grad ds grosse Buch führe,
u näh doch tatsächlech jedes vo üs düre.
Mit em nä feine Figeschnaps hei mir mit em Schmutzli u em Chlaus agstosse,
u drufache no super feini Dessert gnosse.
Dä Obe hei mir de gmüetlech zäme lo usklinge,
nume dr Schmutzli u dr Chlaus tuet ds OK fasch nümme heibringe.
I gloube das het dene so guet gfaue bi üs Froue,
dass die äuä ds nöchscht Johr wieder chöme cho verbi gschoue.
A dä Organisationsfroue Edith, Fränzi u Theres merci viu mou,
äs fröit sech sicher scho jedes ufs nöchschte Mou.
I bi jetz am Änd vo mim Bricht aglangt,
u das Johr het wieder viu vo öich ab verlangt.
I weiss aui hei näbscht em DTV viu los u müesse schaffe,
drum muess me sech mängisch für is turne ou chli ufraffe.
Dr Donnschtig isch doch üse Obe, u mir wei doch dä bhaute,
mi cha doch ou vom Alltag chli abschaute.
Drum Froue, äs würd mi sehr fröie u gfaue,
wenn i öich oui fliessig gseh ir Haue.
So jetz hani no ei Gedanke,
nämlech jedem vo öich ganz härzlech danke.
Äs macht eifach riese Spass mit öich Froue zäme,
egal was mir grad ungernähme.
Fürs nöie Johr wünsch i Öich di beschti Gsundheit,
viu Erfolg, Glück u Zfriedeheit.
Öii Präsidentin
Meja Neuenschwander