Johresbricht vor Presidenti 2008
Dr letscht DTV-Alass vom däm Johr isch düre,
ds Nöijohr steit bereits scho vor dr Türe.
Das heisst für mi, i muess jetz drahi,
dr Johresbricht sött doch no gschriebe si.
I fo jetz mou grad a,
mit dr GV afangs Jahr.
Äs git hür ou wieder z’gratuliere,
Christa Kiener u z’Käthy Hert chöi jubiliere.
D’Christa isch zwar hinech nid do,
denn si het hüt grad äs Buebeli übercho.
Ganz härzlechi Gratulation vo üs aune,
u di 20-jährigi Mitgliedschaft tuet üs natürlech ou gfaue.
Ä riese Applaus gits fürs Käthy üsem Unikum,
si fiiret nämlech ds 30-jährige Jubiläum.
I aune Teile tuesch Du am DTV nütze,
u üs Froue überall ungerstütze.
Mit gutem Bispiel geisch Du gäng vora,
i erscht u i zwöit Teu muess me doch ga.
Oder gits öppis z’organisiere oder mi brucht ä Rat,
de hesch Du Käthy ä Idee immer parat.
I hoffe Du bliebisch am DTV no lang erhaute,
mir wei Di nämlech für immer bi üs bhaute.
Äbefaus ä grosse Applaus het ou d’Edith übercho,
mir heise nämlech i üsem Verein ufgnoh.
Schön das Du dr Wäg i DTV hesch gfunge,
u mitmachisch fasch aui Stunge.
Sicher wärde mir ou nid vergässe,
z’Messe im Bäre das feine Ässe.
A näs riese Buffet chöi mir üs dra häre mache,
mit ganz viu verschiedene guete Sache.
Mit äm nä säubscht kreiierte Dessert tuet üs dr Wirt ou no überrasche,
u mir hei chönne bis nach Mitternacht gäng chli drvo nasche.
Ir Gaschtstube unger hei mir dä Obe no lo usklingä,
u mir hei doch wieder ä gmüetlechi GV chönne verbringä.
Im Februar isch Schi-week-end agseit,
das Mou het ds Wätter de nid verseit.
Am Samschtig am Morge viertu vor Siebni tüe mir starte,
denn mir chöis aui chuem erwarte.
Dr schnäuscht Wäg Richtig Morschach tüe mir i Agriff näh,
leider hets haut ou no z’paar Verfahrigä gäh.
Uf jede Fau kenne mir üs im Muotathal jetz de chli us,
so dass mir nöchschte Mou besser chöme drus.
Wo mir de z’Morschach ändlech si acho,
hei mir grad schlöinigscht d’Schi uf ä Buggu gnoh.
Jetz sofort i das Schigebiet Stoos ueche,
mir wei doch die erschte Schwüng versueche.
Z’oberscht uf em Fronalpstock hets ä Beiz,
u das het natürlech ou si Reiz.
Zudäm ich dr Eufischuss noche zum Iriebe,
mir weis mit Schifahre nid scho am Samschtig übertriebe.
Gäge Mittag wei mir di erschti Abfahrt i Agriff näh,
aber de Schnee isch jo scho jetze bleischwär.
Für üsi Scheiche isch das nid äso guet,
aber mir verlüre desswäge nid grad dr Muet.
Mir gö uf ä Klingenstock ueche,
dert chunnt z’Sunne ersch gäge Mittag zueche.
U suber, griffägi, schöni Pischte hei mir dert vorgfunge,
u so dert chönne fahre üser Stunge.
Gäge Obe simer de im Schihus Ibach wieder zämecho,
u dert hei mir äs feins Raclette übercho.
Mit dä Tischnachbare chöi mir üs ou guet ungerhaute,
sogar bim schnupfe chöisi mithaute.
Vom Schnupfspruch chunnt mir zwar numme no i Gring,
Doing, Doing, Doing, Doing.
Hingäge öbs si üs hei abchouft das mir ä Lismigruppe si,
das muess i säge beziefleni.
Drufache hei mir wieder müesse uf Schi stoh,
mir müesse jo no uf Morschach ache goh.
Mit äm nä Schlummerdrunk tüe mir no zäme ha,
u stosse no einisch uf dä glungnig Tag a.
Am Sunndig Morge tüe mir scho gli verwache,
will d’Sunne üs scho früech tuet alache.
Vor em Schifahre hei mir no äs feins z’Morgä gnoh,
u jetz chas ändlech ab uf Pischte goh.
Wül mir scho so früech dranne si,
si Schneeverhäutnis no hervorragend gsi.
Das nütze mir us u fahre ohni Pouse,
ersch gäge Mittag gö mir öppis go schnouse.
Äes isch sowieso langsam brekär,
denn dä Schnee isch jo scho souschwär.
So gniesse mir dr Nomi uf dr Sunneterasse,
bim Sünnele, Blitze oder chli Jasse.
Nume di Agfrässnä gö no mou uf Schi,
u di Angere bliebe höckle bim nä Gleseli Wi.
Gäge Obe simer aui wieder zämecho,
mir müesse leider wieder heizu go.
Theres, die Organisation isch dir super glunge,
merci viu mou für die wunderschöne Stunge.
Dir gloubets nid, äs isch zwar nid zum Scherze,
ds Fränzi fiiret Vierzgi afangs Merze.
Zum Hornusserhüsli hesch Du üs iglade z’cho,
dert hei mir im Waud scho äs feins Apero übercho.
Drufache hei mir aui ä Löffu müesse fasse,
das hesch natürlech nid dörfe verpasse.
Ä feini Waudbruederröschti hei mir dörfe gniesse,
u drzu äs Glas Rote oder Wysse.
Aui zäme us dr gliche Pfanne z’ässe,
das wärde mir sicher ou nid vergässe.
Nach em Ässe hets no äs Schnäppsli gäh,
wo aui zäme hei müesse näh.
Äs häufi bim verdoue, sigi guet für ä Mage,
uf jede Fau tüi das gar nüt schade.
Im Hüsli inne hei mir no z’Kafi u z’Dessert gnosse,
u später no so richtig uf z’Fränzi agstosse.
Mir hei nid lang müesse dänke,
ä Stür a näs nöis Velo tüe mir dir schänke.
Das isch nämlech z’oberscht stange uf dire Wunschlischte,
wül mit dim aute Chlapf gäng so muesch pieschte.
Jetz chasch ou wieder mit em Sascha mithaute,
mit däm Velo muesch jo fasch gar nümme tschaupe.
Chasch jetz ou mit em Velo go poschte,
denn tschaupe tuet di jo nüt choschte.
U z’wichtigschte isch de no,
hesch no grad öppis für Fitness do.
Gmüetlech si mir no zäme bliebe si,
u dä Obe isch wieder viu s’schnäu verbi.
Eis isch aber klar, IBEDRUCKEND isch äs gsi,
vo üs us chönntsch Du scho nöchscht Johr füfzgi si.
Spass bisite, no einisch härzleche Dank für das schöne Fescht,
u das mir hei dörfe si diner Gescht.
Dr Gländlouf hei mir hür gha änds Apriu,
do macht z’Wätter meischtens was äs wiu.
Mit dr Keuti si mer zwar no guet bedient gsi,
Räge u Schnee hätti no dümmer chönne si.
Im Ok hets jo do ä Wächsu gäh,
wo mir nid so gärn tüe entgäge näh.
Für dä Poschte vom Wanner Adrian ds bsetze,
hei mir dörfe Schneider Renate isetze.
Merci no einisch Rente das Du dä Poschte hesch a gnoh,
mir si do drüber aui zäme sehr froh.
Dä Alass isch ou wieder guet acho,
o wenn nid ganz sövu Löifer wie letscht Johr si cho.
Ou Feschtwirtschaft isch trotz dr Keuti guet gloffe,
äs wird haut ou mängs Kafi fertig gsoffe.
So hets wieder ä rächte Batze gäh,
wo mir gärn tüe i üsi Kasse näh.
Am OK u sine Häufer no einisch rächt härzleche Dank,
dä Alass isch für üs schlichtwäg ä Bank.
Dr zwöit Teu hei mir bim Zämehöckle no gnosse,
u tüe uf ä Geburi vom Rousi astosse.
Somit wäre mir im Meie,
do isch DTV-Reis a dr Reihe.
Ds Käthy u Marianne hei die organisiert,
u si hei dert wieder einisch meh brilliert.
Di zwo tüe üs uf die Reis ganz guet vorbereite,
sit afangs Johr tuet üs dr Kanton Schaffhuse scho begleite.
Diversi Eignigsteschte hei mir müesse absolviere,
u ds Lied Munotsglöckelein i studiere.
I ha gschtuunet wie dir Froue die Teschte ärnscht näht,
u für die Froge z’beantworte aues gäht.
Übers Internet cha me jo scho mängs usefingä,
u das tuet üs Froue ou ganz guet glingä.
Aber das mit dä Stägetritte fingsch ou im Internet nid use,
das muesch go zeue vor Ort uf Schaffhuse.
Uf jede Fau hei mir Froue aui die Teschte bestange,
u bis uf zwo si aui mitti Mai uf di Reis gange.
Di einti vo dene zwo wär i gsi,
i ha müesse deheime si.
Vor ä Lungenentzündig gschwächt hani müesse z’Näscht hüete,
statt mit öich cho reise wo mir soviu würdi bedüte.
Aber dank öine SMS wo i ha übercho,
hani doch übers Natel ou chli teil gnoh.
Uf jede Fau am Bricht a, u vom ghöre säge,
heit Dir Froue äs super Wucheänd chönne erläbe.
Merci viu mou Käthy u Marianne, di Reis isch öich glunge,
aui zäme heise nämlech hervorragend gfunge.
Im Juni isch de Seeländische Turnfescht a gstange,
mit viune Turnerinne si mir uf Studen gange.
Die nöie Allroundspieli chöi mir no nid so guet wie die aute,
aber mir hei trotzdem scho vei echlei chönne mithaute.
Ä sichere Wärt si immer d’Wurfdiszipline,
dert chöi mir gueti Pünkt verdiene.
Ä nöii Disziplin näme s’paar Froue i Chouf,
si näh teil am Crosslouf.
Bi über 30 Grad u bir glühende Sunne,
si di vier Froue hervorragendi Zyte gsprunge.
Aui zäme hei wieder gäh ihres Bescht,
u im Mittufäud hei mir abschlosse das Fescht.
Gmüetlech hei mir zäme no dr zwöit Teu gnosse,
u dä Tag isch wieder viu schnäu verflosse.
Im Frühlig, Summer u Herbscht,
si wie immer Messemärit-Fescht.
Vorewäg hani do nume grad ei Gedanke,
u möcht aune Märitfroue ganz härzlech danke.
Für aui Isätz wo dir gäng tüet uf öich näh,
u drzu no gäng z’Beschte chöit gäh.
Äs isch schön so näsTeam z’ha,
wo me sech zu hundert Prozent druf cha verla.
Speziell isch hür sicher dr Summer gsi,
wül do grad zwe Märite si.
Zum Einte dr 125 Johr Jubiläumsmärit am Sunndig,
u zum Angere dr normal Messemärit am Mändig.
Für ä Jubiläumsmärit lege mir auti Chleider a,
u de meischte Froue tuet das ou ganz guet stah.
Zum Jubiläum wei mir üsne Gescht äs Dessert spendiere,
ä Brönnti Creme dörfe si zu üs ä Stang cho probiere.
Aber dä Sunndig isch so ä hitzige Tag,
mir rächne drmit, das do niemer a nä Märit mag.
Do hei mir üs aber aui zäme trumpiert,
vo aune Site si di Lüt i marschiert.
Im Nu si üser Plätz vergäh,
vo wo wei mir no Tische hernäh.
Im ganze Quartier tuet z’Käthy umespringä,
u tuet vo dä Nachbarslüt Gartentischli bringä.
So hei mir fasch für aui äs Plätzli gha,
u dr Räschte müess haut eifach bliebe stah.
Aber ou die tüe üsi Bratwürscht gniesse,
u nä drzu äs Bierli od äs Glas Wysse.
So isch dä Tag natürlech gleitig verbi,
u mir si todmüed, aber zfriede gsi derbi.
Afangs Juli tüe no äs paar Froue
Bim Jekami-Schiesse verbi gschoue.
Zwo Gruppe hei schlussändlech mitgschosse,
u hei ou mit guete Resultat abgschlosse.
So, u jetz si d’Summerferie dranne,
uf di tüe mir natürlech aube ou plange.
I de Monät Ouguscht u Septämber,
stöh diversi Johresmeischterschafte ufem Kaländer.
Mir hei haut im erschte haube Johr viu müesse üebe fürs Turnfescht,
drum faue viu Johresmeischterschaftsdiszipline uf ä Herbscht.
Sig das Leichtathletik, Keiglä u Kondition,
oder Hornusse u Triathlon.
Überau tüet dir Froue rege teilnäh,
u jedi probiert sis Beschte z’gäh.
Im Oktober si di Chlinschte wieder dra,
ds Muki u ds Kitu foht nämlech wieder a.
Ganz viu Ching chöme das Turne cho bsueche,
u si tüe ou scho auergattig versueche.
Aune Leiterinne härzleche Dank, dass Dir nech die Zyt tüet näh,
u dene Ching bim Turne ganz viu Fröid chöit gäh.
Im Novämber isch wieder dr Lottomatch dranne,
dä isch angeri Johr ou scho besser gange.
Aber das isch immer äs obsi u nidsi gsi,
dä cha nöchscht Johr scho wieder besser si.
Grad afangs Dezämber isch dr Chlausehöck agseit,
ou hür het ds Wätter wieder totau verseit.
Zum dritte Mou i Foug chöi mir di Wanderig nid ha,
mir müesse grad wieder diräkt is Hornusserhüsli gah.
Aber das Wätter het üs nid chönne schocke,
zum nä Spaghettiplousch hei mir glich chönne zämehocke.
Leider het hür dr Samichlous ä chli Ängpäss gha,
är hett eifach nid aune Orte chönne persönlech häregah.
Spontan bini haut no i nä Chlouseroue gschlüffe,
u äs isch gar nid äso schlächt glüffe.
Aus i auem isch doch dä Obe glunge,
u äs nöis OK für nöchscht Johr hei mir ou gfunge.
Am letschte Turndonnschtig si mir nid ir Haue zämecho,
für denn hei mir ä Geburiiladig übercho.
Doris Rätz isch jetz im 40-er Club ou derbi,
u si ladt üs aui i ihre Schopf i.
Dert si mir versorget worde mit Spis u Trank,
i säge no einisch rächt härzleche Dank.
Zur Ungerhautig hei mir ou öppis wöue bitrage,
u tüe dir paar Sketche usem Turnerläbe vortrage.
Mit ihrne Stöggelischuh u dr blaue Perücke,
cha Mändle üses Numerogirl d’Lüt ganz guet entzücke.
Im Grosse u Ganze isch di Show gloub guet acho,
mir hei ömu äs guets Echo übercho.
Doris merci no einisch viu mou für das schöne Fescht,
u das mir hei dörfe si diner Gescht.
So hei mir das Turnerjahr lo usklingä,
u mir hei doch wieder viu schöni Momente chönne zäme verbringä.
Zum Schluss wett i eifach no dänke säge,
für aues won ig mit öich darf erläbe.
Äs macht mir witerhin Spass mit öich Froue,
u möcht ganz härzlech danke für öies Vertroue.
Öii Präsidentin
Meja Neuenschwander