Johresbricht vor Presidenti 2010

 

 

Ds Johr 2010 isch verbi,

u i bi mit em Johresbricht wieder einisch hinger dri.

I hoffe Dir tüet mir das nid übel näh,

u chönnet mir aui vergäh.

I bi haut ä Bärner u tue Sach gmüetlech a ga,

das cheibe Gjufu mani eifach nümme ha.

So, de foni däich jetze a,

am beschte grad im Januar.

 

 

Für di erschti Turnstung hets sech Marianne u ds Käthy öppis originells lo ifaue,

das tuet üs aune ou sehr guet gfaue.

Mir wärde i teilt i drei Gruppe,

u so tuet sech ä tierische Obe entpuppe.

Nämlech us Affe, Hühner u Küh,

gäh mir üs aui sehr viu Müh.

Mit ifädle, näie u Salzbrezeli ässe,

tüe mir üs i Form vo Stafette gägesitig mässe.

Di Turnstung isch wieder luschtig u glungnig acho,

u z’letscht gits jo de aube no äs Apero.

Mit em nä Cüpli stosse mir de aui a,

u wünsche aune zäme äs guets nöis Jahr.

 

Mitti Jänner hei mir de GV im Dorfbeizli z’Brunnental,

dert hei si nämlech ä wunderschöne Saal.

Dür d’Fusion vo dene vierne Gmeine,

si d’Müglechkeite ou grösser für Vereine.

Mir hei di Chance packt u heis nid beröit,

u das so viu si cho, het mir sehr gfröit.

Dr Höhepunkt vo dere GV isch ganz klar gsi,

sithär isch z‘Rousi bi üs aus Ehremitglied derbi.

Ds Käthy u Marianne hei übers Rousi ä Fotoshow vorgführt,

u ä Laudatio gha, wo üs aui sehr het grührt.

No einisch härzlechi Gratulation u i hoffe Du bliebsch üs no lang erhaute,

mir wei di nämlech bi üs i DTV bhaute.

Bim nä feine Ässe u äm ne Glesly Wy,

simer de im zwöite Teu no chli bliebe si.

 

 

Grad afangs Horner tuets mi sehr fröie,

das Dir Froue sit cho ds Theater luege uf Mülchi i Löie.

Nach em Theater tüe mir no chli zämehocke,

nume dr Wirt tuet üs chlei schocke.

Nach em zwöite Haube tuet ihm scho Wysorte usgho,

das chöi mir würklech nid verstoh.

 

Äbefaus Fasnacht isch ou no im Februar,

do müesse mir haut nachem Turne ou no gschwing verbi gha.

 

 

Ds erschte Wucheend im Märze isch Ski-week-end agseit,

u dr Bucheli het auso hie totau verseit.

Trotz dene schlächte Wättervorhersage,

tüe mir üs glich uf das Adubode wage.

Uf dr Sillere obe acho, hei ou d’Optimischte müesse igestoh,

das mer gschider afe einisch i Beiz tüe go.

Nach ere Stung müesse mir haut de glich los,

mir müesse jo richtig Hahnemoos.

Gseh tuet me gar nüt u drum simer aui froh,

wo mir ir Standhütte, i üsere Unterkunft si a cho.

Do hets ä schöni Iglubar u di isch üs grad gläge cho,

so hei mir chönne aui zäme is Apero.

Am Nomi tüe die einte no chli jasse u ä Teu geit no einisch use,

u angeri gö no chlei go pfuse.

Aber mit Schlofe sigi do schins nüt gsi,

all pot chöm do öpper zur Türe i.

So ä intressante Mittagsschlof tuet d’Regula säute ha,

si het üs ömu viu z’verzeue gha.

Mit em nä feine Nachtässe tüe mir dä Tag abrunde,

u mir hei doch trotz däm schlächte Wätter gha schöni Stunde.

Am Sundi Morge tuet üs gschwing Sunne a lache,

u mir tüe üs grad sofort uf Schi mache.

Super Verhäutnis u mir hei sogar öppis gseh,

eifach herrlich i däm schöne Pulverschnee.

Plötzlech ghöre mir vor üs öppis knalle,

u Doris tuet mit em nä Skifahrer zämepralle.

Mir si aber aui zäme sehr froh,

wo Du de wieder tuesch ufstoh.

Mit äre Verstuchig u Prellige bisch du ewägg cho,

zum Glück isch äs nid no viu schlimmer cho.

Gäge Mittag hets leider scho wieder zu do,

u so hei mir haut wieder i Beiz müesse go.

 

Im Louf vom Nomi tüe mir de gäge hei zue uf bräche,

mit schönem Wätter chame nümme rächne.

Trotz däm schlächte Wätter hei mirs glich guet gha,

mir wüsse haut ou süsch öppis mitenanger a z‘fah.

Merci viu mou Rousi für ds organisiere,

u viellicht chöi mir das no einisch bi schönem Wätter probiere.

 

 

Für em 14. April hei mir vor Renate ä Iladig übercho,

nämlech zum Tag der offenen Tür zum 40 Geburi  bi ihre verbi z’go.

Di Iladig tüe mir natürlech sehr gärn a näh,

u überlege üs lang was mir ihre chönnte gäh.

Plötzlech chunnt üs i Sinn, die überchunnt jo ä nöii Chuchi im Herbscht,

so tüe mir ihre DTV-Tischset kreiire zum däm Fescht.

Mit Vorbeugigs- u Glückspfläschterli tüe mir ar Renate gratuliere,

u tüe se am ganze Körper mit dene Pflaschter verziere.

Das söu ihre häufe ohni z’übertriebe,

das sie das Auter ou ma verliede.

No einisch härzlechi Gratulation u beschte Dank,

für dä schön Obe mit Spys u Trank.

 

 

Im Meie hei mir dörfe jubiliere,

zum 25. Mou tuet dr DTV dr Gländlouf organisiere.

Aber ou ds Wätter isch do gar nid famos,

äs schiffet u gwitteret gnadelos.

Aber üsne tröie Löifer isch das Wurscht,

d’Houptsach äs git när öppis z’ässe u öppis für ä Durscht.

Zum Jubiläum gits das mou ersch no ä DTV Spitzbueb,

das passt doch zum Kaffi sehr guet.

Aus i auem isch dr Gländlouf aber sehr guet gloffe,

u mir tüe jetz für nöchscht Johr uf schöns Wätter hoffe.

Am OK u aune Häufer no einisch rächt härzleche Dank,

dir sit für üse Verein schlichtwäg ä Bank.

 

 

Im Juni steit wie immer äs Turnfescht a,

do tüe mir aui ou sehr gärn häre ga.

Am seeländische Turnfescht muesch eifach teil näh,

ds Müntschemier tüe die Froue wieder aues gäh.

Natürlech nid nume im Turne gäh si z’Beschte,

d‘seeländische isch eifach ou geniau zum feschte.

Im bernische tuet sech ds kantonale Utzistorf empfähle,

u wülls so noch isch, gö mer dert o no grad häre.

Ou do chöi mir bi schönschtem Wätter üsi Wettkämpf abschliesse,

u natürlech ou dr zwöiti Teil gniesse.

 

 

Afangs Juli tüe mir mit ere Velotour Summerferie ilüte,

wo für üs ja aui ou öppis bedüte.

 

 

Im Ougschte simer de wieder aui froh,

das nach de Ferie wieder öppis tuet goh.

Ou wenn uf em Programm steit 800-Meter oder Triathlon,

chöme doch die meischte mit grosser Motivation.

 

Ou üsi DTV-Reis steit im Ougschte a,

wo tuets äch das mou häre ga.

Träffpunkt isch am Bahnhof z’Bätterkinge,

genau am Morge viertu ab sächsi müesse mir üs dert ifinge.

Weme so früech am Morge muess parat si,

lot me das Sandwich striche doch eifach lo si.

Am Donnschtig obe cha me bim Toni di Sandwichbstellig ufgäh,

so chöi mir di am Samschtig nume no mitnäh.

Mit em Zug geits de Richtig Oute zue,

u dert chunnt üses Ehremitglied Therese Chrischte drzu.

Bim nä usgiebige Apero tüe mir di Zugfahrt gniesse,

u gö witer nach Engubärg über Wolfeschiesse.

Ds Wätter isch ou hüt wieder sehr sehr nass,

aber irgendwie müesse mer ueche uf dä Jochpass.

Jedes cha de säuber entscheide öbs mit de Bahne oder ds Fuss wöu go,

am Obe im Restaurant Alpstübli simer ömu aui wieder zämecho.

Nach em nä feine Nachtässe tüe mir dä Obe mit Spiele gstaute,

u üs ou no intensiv über Wolfeschiesse ungerhaute.

Gäge Mitternacht si de aui müed gnu,

u äs git ändlech de ou Nachtruh.

Am Morge früech, mir chöis chum gloube,

oder hei mir no Pflotsch i dä Ouge.

Äs het gschneit u isch kaut worde über Nacht,

u jetzt hets d’Wulche ufgschrisse u äs het ufgmacht.

Nachem Zmorge lege mir aus a mo mir derbi hei,

denn äs früt üs scho chli a Bei.

Bir Bärgstation tüe si üs äs Trotti oder äs Devil-Bike gäh,

u jetz chöi mir di steili Schotterpischte i Agriff näh.

Z’Bremse muesch vei echlei guet im Griff ha,

süsch tuets di sofort uf d’Schnurre schla.

Aber aui hei di Abfahrt guet gmeischteret,

u ab u zu hei üs no Gemsi u Murmeli begeischteret.

Bim Trübsee chunnt de no Sunne füere u tuet üs erhitze,

so dass mir chöme is schwitze.

So chöi mir äs paar Kleidigsstück wieder abzieh,

u vo hi us z’Fuss de witerzieh.

Umgäh vore wunderschöne Bärgwäut,

mache mir uf dr Gerschnialp no ä Mittagshaut.

Z’letschte Stück bis nach Engubärg hei mir no chlini Trotti chönne fasse,

aber ou mit dene muesch de ufpasse.

Mit em Zug geits jetz wieder gäge hei zue,

u mir hei sicher de im Zug chli Ruh.

Aber vo Ruh isch do nüt gsi,

näbe üs stiegt ä Meitschiriege i.

Mit dene tüe sech äs paar Froue grad a fründe,

mi hätt grad chönne ä Spielgruppe gründe.

U plötzlech steit üse Wage zmitts ihre Wasserschlacht,

u das het dene Ching natürlech sehr Spass gmacht.

Dr Kondi tuet grad drü mou läär schlücke,

u tuet für einisch grad beidi Ouge zudrücke.

Är tuet Türe grad wieder zu,

u loht üs zum Glück i Ruh.

Für d’Organisation möcht i am Fränzi u ar Edith no einisch merci säge,

das mir so nä schöni Reis hei dörfe erläbe.

 

 

Im Septämber isch wie immer Johresmeischterschaft im Hornusse dranne,

do tüe mir aube ou scho lang druf plange.

A däm Obe ladt üs Steffi no zum nä Apero i,

si isch nämlech jetz im Vierzger-Club ou derbi.

No einisch härzlechi Gratulation zu dene Johre,

Du bisch doch immer no wie nöi gebore.

 

Dr Höhepunkt vo däm Monet isch ganz klar,

dr DTV besteit nämlech hür 40 Jahr.

Uf di 40 Johr hei mir äs Fescht agseit,

u das isch de nid abverheit.

Rätz Doris tuet üs ihre Partyroom zur Verfügig steue,

u für z’Ässe tüe mir dr Pizza-Service bsteue.

Saläte tuet dr Vorstang mache,

u dr Beck tuet zum Dessert feine Stückli bache.

Für z’Trinkä isch ou gsorget u für d’Ungerhautig o,

jetz cha das Fescht nume no los go.

Was bruchts no das das Fescht tuet glinge,

natürlech das aui gueti Luune mitbringe.

Uf di sächse het me sech de troffe zum nä Apero,

u fasch aui hei chönne cho.

Zwirbele isch do de äs grosses Thema,

zum Glück geits do nid nach em nä Schema.

Jedes tuet de säuber dräie a däm Zwirbelirad,

entweder gits de ä Pris oder äbe de ä Ufgab.

So si die Lösli aui a d’Frou cho,

u mir hei so ä super Ungerhautig übercho.

Aber ou für d‘Arbeite wo so bim nä Fescht tüe a stoh,

tüe bim Zwirbele ou use goh.

So isch das Fescht organisiert gsi u i muess säge,

mir hei ä unvergässleche Obe zäme chönne erläbe.

Das isch doch dr Sinn u Zwäck vom nä Verein,

nämlech aui zäme u nid einzelni allei.

 

 

Im Oktober si di Chlinschte wieder dranne,

di tüe aube scho lang uf das Turne plange.

Üsne Muki u Kitu Leiterinne härzleche Dank das dir das leitit,

u dene Ching so viu Fröid bereitit.

 

Öppis wo immer ou sehr guet a chunnt si üser Märitfescht,

im Frühling, Summer u im Herbscht.

Gäng wie meh Lüt chöme üs ä Marit cho bsueche,

dür das chöi mir ou ä schöne Batze i Vereinskasse buche.

Drum hets Märitteam jetz ou Isatzplän müesse i führe,

so das mir dä Märit witer erfougrich chöi führe.

Merci viu mou Froue für öier Isätz,

Dir sit eifach aues zäme Goldschätz.

 

 

Im November isch dr Lottomatch üse Alass,

ou dert hei mir Froue gäng viu Spass.

 

 

Wie immer steit im Dezember dr Chlausobe uf em Programm,

u hür si zum Organisiere Märit-Froue dran.

U do hei di Froue, i cha nech nume säge,

ihri organisatorische Fähigkeite so richtig chönne usläbe.

Das umfangriche Programm wo sie tüe gstaute,

hei si ou tatsächlech uf Minute chönne i haute.

Nach däm herrliche thäiländische z’Nacht,

hets OK us üs vier Gruppe gmacht.

Nämlech i Gruppe Senf, Ketchup, Wurscht u Brot teile si üs i,

ds Märitteam tuet ou do guet überlege derbi.

Am nüni null 6 isch ds ABC DRS 3 Ratespiel uf em Programm,

u mir Gruppe spiele aui gäge nang.

Dr Samichlaus tuet ou hür wieder cho,

u är het doch tatsächlech vo jedem öppis vernoh.

Sogar Värsli heit dir Froue gseit äs isch ä Fröid,

i gloube dr Samichlous het dä Bsuech bi üs gar nid beröit.

Um 22.32 darf üser Gruppe de gar niemer meh störe,

jetzt geits de drum bim Kampf der Chöre.

Zum aktuelle Hit „äs wott äs Froueli z’Märit go“,

tuet jedi Gruppe für sich no einisch aus düre go.

Jedi Gruppe het theateret u gsunge,

u Jury het nume so mit nüni u zäni ume gschwunge.

Drum hei sech Märitfroue ou überleit,

wie me do äch am beschte vor gheit.

Aui Gruppe hei nämlech mit 29 Punkt abgschlosse,

uf das hei mir no einisch aui agstosse.

Das zeigt wieder einisch meh, ds Mitmache isch ds A und O,

nume so cha ä Verein funktioniere u go.

No einisch härzleche Dank für dä super Alass,

äs hett üs aune gmacht sehr viu Spass.

 

 

Zum Schluss wetti no säge „Schön das äs öich git“,

denn jedes vo Öich git däm Verein dr Kitt.

I bi sicher wemer so chöi witerfahre,

besteit für üse Verein keiner Gfahre.

 

 

Öii Präsidentin

 

Meja Neuenschwander