Wo ig im Dezämber dr Turnplan gstudiert ha, isch mir langsam bewusst wordä, dass i mi chli sett entwicklä, wöu i jo d Ehr ha gha, diä erschti Turnstung im 2012 "dörfä" z organisierä!

12.1.2012 "Spass mit Susi" isch uf däm Plan gstangä. S'Motto hani letscht Johr scho bekannt gäh. D' Fraue hei "unbedingt" wöue Ruäderä... "Ui" - hani dänkt: "Ruäderä und no Spass ha drbi, das wird schwierig...aber irgendöpis chunnt mir de scho i Sinn."

S'erschtä Spässli hani mir de au scho 2 Täg vor derä Turnstung erlaubt. Ha es Rund-Sms gstartet, dass mir dank dä miude Temperaturä und em schöne Wätter nid "trochä Ruäderüebigä" ir Hauä müessä mache, sondern dass mir üs am Donnschtig obe am haubi achti direkt z'Arch ar Aare bim Chef vom Ruäderclub träffe. Neoprenazüg und Schwümmwestä sigä vorhande. Stirnlampä, trochni und warmi Chleider für nächer wäre vo Vorteil. Ha mit derä Mäudig vöu Fraue vom Verein glaub chli verchlüpft (wär ig au und isch jo schliesslich au mi Absicht gsi, sorry nomou)... Nachem letschtä Satz, dass es ebä nur e Spass sig, hei sich de diä meischtä vo däm Schreck schnäu erholt... Diä ganz "Hert-ä" wäre aber lieber uf d Aare, gäu Käthi ? Nei, zum Glück nid. Mir hei üs ganz normau ir Hauä troffä und si gmüetlich ar Wärmi is neue Johr gruäderet. Nachem "Ruäderball" zum ufwärme, si mir de ganz bedächtig zu Südseekläng "Aloaé" dur d' Turnhauä "gschipperet". Niämer hätt dänkt, dass do drbi öpis chönnt passierä...aber doch: D'Ürslä hets auso tatsächlich gschafft us em "Böötli" z purzlä. S' Käthi het de aber dr Ärnscht vor Lag (dass si nid cha schwümme) sofort begriffä und isch blitzschnäu uf em Buuch dur d'Hauä crawlet um se go z'rettä. Mit Hiuf het me se de wieder i ihres Schiffli ghievt. Zum Glück isch nüt schlimmers passiert gäu! Oder wiä hättsch das süsch dir Versicherig gschiuderet ?...("Liebe Schweiz. Mobiliar"... oder so...)

Nach derä Südsee-Stimmig si de aui ganz schnäu wieder us ihrnä Träum grissä worde. "Fluch der Karibik" isch us dä Luutsprächer ertönt; und bi däm Wettbewärb isch es um alles oder nüt gangä. Diä Gruppä wo am schnäuschtä d Schatztruhä glährt het gha, het putzt (dr Hauäbodä au no grad drzuä...) Leider het ei Gruppä x-mou Fählstart gmacht. Drum het dr unvergässlich Sportreporter Hans Jucker mit sim legendärä: "Ja und schon wieder ein Fehlstart - das regt mi uf, diä dummä h... Ruäderer - do schnurrsch und schnurrsch und schurrsch und de fahre si eifach drvo"!  au no si Kommentar us dä Boxä abgäh...

Nach derä "Schlacht" hei mir de no zum Titu "rameurs" ( uf Dütsch "die Ruderer") bi Cherzäschiin usgruäderet, und de aschliessend ufs neue Johr agstossä. Merci Frauä, dass dr dä Spass mitgmacht heit ! Wär mäudet sich freiwillig für d Organisation vor erschtä Turnstung im (eidg. Turnfest)-Johr 2013 ?...

Es spassigs, gsungs 2012 wünschi euch aunä !

Susi