Chlauseobe 2011

S‘ OK vom hüürig Chlauseobe het üs bim Schützehüsli z Balm mit emä „XL –Fondue“ überrascht . Und extra es Zäut heit’r no für üs ufgstöut, Apéros, Glüähwy und Dessert uftischet. Das isch eifach super gsi Thesä, Fränzi und Edith! 

Alli diä feine Sache hei mir de bi gmüetlichem  Zämesi  und während emä originellä Quiz verdauet. Eifach nur s Käthi het d Spiureglä vo däm Quiz nie begriffe. Ständig het si „Moldovan“  id Rundi gmööget, obwohl d Frog no nid mou isch fertig formuliert gsi…Em Käthi het sech aber s Risiko, wo‘s iigange isch, nid uszahlt. Moldovan isch nie diä korrekti Antwort gsi! Schad, bir Gabriela Amgarten hättsch meh Glück gha Käthi…

Es isch luut zue und här gange bi däm Spiel,  und mir hei fascht s‘ Polterä ar Tür überhört. Doch, wo d Tür ufgange isch und dr Samichlaus vor üs gstange isch, het’s  de doch „blitzartig“ g‘ruäihet…

Fit het er usgseh dr Samichlaus mit sim Schmutzli (er het ne zwar Bimbo gnennt…). Ja, s het eim dünkt, er autet nüt, im Gegeteil - er het irgendwie jünger usgseh aus süsch. Aber er isch gwüss wäger genau glich ufmerksam  gsi wie die anderä Johr. Er het praktisch nur lobendi Wort für üs gfunge…wie chönnts au angersch si...Gwüss wäger sigä mir alli gäng ganz ghörigi und liebi gsi das Johr; das het är immer wieder betont. Jo, es het ihm sichtlich gfaue bi üs - em Samichlaus. Er het üs de au no es tolls Gschänk mitbrocht. Nebst Nüssli, Mandarinli het är üs es passends Armband zu üsem neu Trainer gschänkt – e richtigä Gentleman dä Chlaus ! Und zum Schluss het er gmeint : „So,  jetz no „e Figä für d‘ Brigä“ - und er isch de nach däm Figäschnäppsli grad bis zu später Stund bi üs blibä…Das het är sich chönne leischtä, wöu är ke wiitä Heiwäg meh i töifä, töifä Tannewald het gha. Nei , är sigi jetz im Coop z Lyssach „stationiert“. Wahrschinlich us wirtschaftliche Gründ. Dr müehsam, läng Transport vo Nüss und Mandarinli i Waud, isch au für e Samichlaus langsam nümm rentabel.  Bi ihm het’s  äuä au Sparmassnahme gä…

Merci  Samichlaus und Bim…sorry…Schmutzli – dr dörfet gärn wieder mou bi üs verbi cho - au wenn sich 1 Turnerin für nöchscht Johr e andere Chlaus gwünscht het …(s.Fotos)…

Es grosses MERCI liebs OK für dä schön Obe !

(Ps. Liebä Läser : Falls gwüss wäger mou is Coop uf Lyssach gohsch oder i Schlagertämpu – gib acht und sigsch gäng ganz ghörig – dr Chlaus und si Schmutzli chönntä Dir nämlich dört begägnä !)

Bricht und Fotos S.F.