S‘ dasjährige seeländische Turnfest hei mir unterem Motto "FF" i Agriff gno. Mir hei üs füre 3-teilig Vereinswettkampf "Fraue/Männer" (i üsem Fau: "Fraue/ ohni Männer"…) agmäudet. Alles isch neu gsi das Johr : D'Spiel – mir hei Abschied gno vo Beachball und dä andere Spiel vom Fachtest (aber niemer het denä glaub nochetruuret). Neu hei diä Spiel ebä gheisse "FF" ("Fit & Fun"). Und au üses "Tönü" isch neu -   "FF" wie: 

„Früschi Farbe“! Üses grüene, neue Outfit hei mir so richtig chönne iweihä (vor Sturm-und Rägejagge bis zur Sonnebrille und de andere passende Accessoires….s. Fotos...).

„Fit & Fun“ – mit dene für üs neue Spiel, hei mir dä Wettkampf agfange . Mir hei üs de au grad Müeh gäh wie verruckt, aber s "F" für "Fun" isch wie gäng im Vordergrund gstande. Nid so aber bi üserä Kampfrichterä bim 2. Spiel...

„Fähler !!! Falsch !!!“ het diä plötzlich inägmöögget und gwätteret: „Heit‘r eigentlich au mou güebt“ (jo, sogar "2mou"…Anm. der Schreiberin). Do si d‘ Fraue natürlich no während em Spiel bliebe stoh und hei sich verdutzt gfrogt: "Was mache mir de falsch?" Am Schluss het si gmeint: „Minus 17 Punkt, wöu dr immer uf d‘ Linie tschauppet sid“! Uiuiui…het se ächt üses "giftgrüene" T-Shirt chli giftig gmacht? Anyway…mir hei de emu gwüsst „wo dr Bartli dr Moscht hout“ und hei üs fürs Kugelästosse und Schleuderä nomou is F...klömmt !

„ Fit im Festzelt“: Jo, do si mir de üsere Beschnote wieder chli nöcher cho…. S‘ het aber au dört das Johr nid ganz glängt, wöu es paari vo üs no…

„Fit füre Frauelauf“ am Sonntig hei wöue si und däm Fescht deshalb früehzytiger als üblich "Adiö" gseit hei; und a däm Lauf het sich wieder einisch meh usegstöut, dass üs eigentlich "Gring ache und secklä" am ringschtä goht...

S het wieder Spass gmacht Fraue, obwohl i immer no nid tscheggä, öb i jetz links oder rechts um diä Stäcke muess bim Hockey-Parcour...

(Bricht und Fotos S.F.)