Dr hüürig Chlauseobe hei üsi Froue organisiert, wo süsch immer dr Messemärit-Stand vom DTV "schmeisse". Ja, und wenn üsi "Märit-Froue" e Alass (auso hüt seit me däm Event) organisiere, de mache si nüt halbbatzigs....

Läck, dä Obe isch organisiert gsi, säg i euch!!! Uf d' Minute gnau si Apéro, z'Nacht, dr Chlaus, d' Spiel etc. planet gsi. Und wer's glaubt oder nid, dä Plan isch ighaute worde wie dr Fahrplan vo üserä SBB! Oder säge mir emu fascht...Nur dr Chlaus isch ungefähr oder ganz genau gseit 8 Sekunde z'spot iitroffe. Statt 21h 43min. 00sec. het är erscht um 21h 43min. 08sec. a Türe klopfet ! Aber alli hei Verständnis zeigt; dr Chlaus het's nämlich das Johr nid eifach gha bis zum Schützehüsli uf Balm z'stapfä. Däm arm si wäg derä Affechälti d Brillegläser iigfrore. So het er chuum dr Wäg chönne gseh. Aber liebe Chlaus: Nur 8 Sekunde Verspötig bi settige Wetterverhältnis isch e super Leischtig - Bravo und MERCI, dass Du mit em Schmutzli bi üs verbi cho bisch! Und danke au für diä schöne, mit viel Liebi... vorbereitetä "Robi-Chlausesäckli"...(statt Nüssli, Mandarinli, Mäiländerli und Chräbeli het är üs das Johr miterä Bratwurscht, emenä Tübeli Senf, emä Mütschli und emä chlinä Schnäpsli überrascht - und das isch ke Witz...).

Es isch de no um 21.06 Uhr (!) s' ABC DRS 3 Ratespiel ufem Programm gstande. Do hei sich 4 Gruppe (Gruppe "Bratwurscht", "Senf", "Brot" und "Ketchup") "duelliert".

Nach däm luschtige Quiz hei sich die gliche Gruppe um 22.32 Uhr (!) au no bi "Kampf der Chöre" gmässe...Jedä Chor het mind. 3 Strophä vom aktuellä Hit: "Es wott es Froueli z'Märit goh" müässä/dörfä "performä". Do isch natürli nomou diä eint oder anderi Träne gflossä vor Lache! Am Schluss het d Gruppe "Ketchup" mit 29 erhaltene Punkt vor "Schüri" gwunne, knapp vor dr Gruppe "Brot" mit 29 Punkt, und no chli knäpper vor Gruppe "Bratwurscht" mit 29 Punkt. Uf em "letschte" Rang het d' Gruppe "Senf" mit ....29 Punkt brilliert.

Pünktlich hei mir üs de um "23.29 Uhr" uf e Heiweg gmacht, so wie's d' Märit-Froue uf dr Iiladig vorgseh gha hei....

Merci Froue (Käthi, Brigä, Ürslä) für dä schön Obe, wo dr minutiös und so ideeriich vorbereitet heit - es isch eifach super luschtig gsi!

D' Sue het üs mit ihrne asiatische Kochkünscht kulinarisch verwöhnt - Merci au vielmal!

Und übrigens liebi Läser: Heit'r scho gwüsst, dass dr Samichlaus neuschtens d' Robidog-Säckli receyclet (s. Fotos) ?

Bericht und Fotos S.F