Johresbricht vor Presidenti 2006
Scho wieder isch äs sowyt,
mir stöh mitts ir Wiehnachtszyt.
Wieder einisch meh muess i Nachtschicht i lege,
denn dr Johresbricht söt i scho lang bir Regula vorlege.
Ä runde Geburi grad afangs Januar,
het chönne fiire z’Gabi Mollet das Jahr.
Äbefaus im Märze ou Schluep Monika,
beidne zäme gsehsch das Drissgi ömu nid a.
Gli druf isch GV gsi im Löie z’Messä,
wo die meischte sicher o nid so schnäu vergässä.
Dr erscht Teu wär jo eigentlech schnäu verby gsi,
umso länger isch me de im zwöite Teu bliebe si.
Das im Löie tuet ä Rotwysorte usgoh,
cha me würklech fasch gar nid verstoh.
Ä Italiener hei si üs de zum Probiere gäh,
wo mir aber nume us de Boccolino wei näh.
Die Boccolino vom Löie tüe üs aber gar nid passe,
di gseh ender us wie Suppetasse.
Dä Wy schmöckt üs gar nid uf em Züngli,
viu meh hei mir no äs chlises Hüngerli.
Grossi Überredigskünscht hets brucht für ä Res z’motiviere,
das är üs no äs kauts Plättli tuet serviere.
D’Entebrustterrine isch zwar nid eso guet acho,
aber mir si jo froh gsi, das mer no öppis hei übercho.
Ou d’Schoggigipfeli si im Brotkörbli bliebe si,
das passt haut scho nid so guet zum rote Wi.
Drufache het me de dr Löie verloh,
um no hurti uf Müuchi a Fasnachtsuftakt z’goh.
Nume gschwing ä Schlummerstange,
bevor me de z’grächtem isch hei gange.
Änds Jänner hani äs nöis Gsicht dörfe begrüsse ir Haue,
das macht mir gäng sehr viu Gfaue.
Pia Vögeli het zu üs i Verein gfunge,
u sithär mitgmacht scho mängi Stunge.
Nachwuchs het d’Ürsle im Februar übercho,
dr Mischa isch nämlech uf d’Wäut cho.
I wünsche aues Guete zu öiem Sohn,
u no einisch ganz härzlechi Gratulation.
Änds Februar si mer is Schi-week-end gange,
do tüe die meischte aube scho lang druf plange.
Wie scho letschts Johr si mir is Simmental ueche,
um dert dr Hornberg wieder gha z’bsueche.
Trotz äm schlächte Wätterbricht,
macht jedi vo üs äs fründlechs Gsicht.
Drufache hets nämlech di Wulche ufgschrisse,
u keini möchti die zwe Täg misse.
Super Pischte u guete Schnee,
feins Ässe, was wei mir no meh.
Merci Briggä für d’Organisation,
äs isch gsi wieder ä Sensation.
Im Märze isch äs wieder mau sowit,
mir hei mit de Hornusser äs Volleybaufit.
Ä schöne Obe hei mir mitenang gha,
u aui simmer no eis uf Müuchi go ha.
D’Hornusser hei auso nid nume Usduur im spiele,
si möge de ou lang im zwöite Teu bliebe.
Im Frühlig, Summer u Herbscht,
si wie immer Messe-Märitfescht.
Dr DTV-Stang isch würklech scho ä Tradition,
dank äre super guete Organisation.
D’Märitfroue würde jo gärn mou zu de Chör go jasse,
aber bis di chöi Beiz zu tue, würde si scho s’erschte Spiu verpasse.
Öich Froue ganz härzleche Dank,
dir sit für ä DTV ä sicheri Bank.
Im März hei mir näbem herte Frühlingstraining,
ou no Zyt für nes Kegle u näs Curling.
Im April isch wieder äs nöis Gsicht cho i d’Haue,
i gloube är Cornelia Roth tuets bi üs ganz guet gfaue.
Si het üs scho vo afang a viu chönne nütze,
si isch üs nämlech as Turnfescht us Fan cho ungerstütze.
Dr Gländlouf het ou hür wieder im Meie stattgfunge,
ou das Johr isch üs dä Alass super glunge.
Öich aune ganz recht härzleche Dank,
ohni öier grosse Isatz chieme mir nümme z’Rank.
Wie immer nach ämänä erfougriche Alass,
hocket me no chli zäme u het viu Spass.
Bim nä Glesly Wy u fröhleche Gesang,
het dä Obe duret no ziemli lang.
Kurz vor em Fürobe bringt König Brigitte no ä Gmüslieferig ar Regula,
u di nimmt z’Messer füre u foht grad mit Schnitze a.
Sie schnitzt feini Radiesli u Kohlräbli für näs Amuse-buche,
u das geit aues furt ganz husch.
Das me mit Kohlräblischinti d’Lüt so cha zum Lache bringe,
das tuet ou nume ar Regula glinge.
Öppis muess i do drzu no säge,
das Gmües isch mir sehr schwär ufgläge.
Rohkoscht nimmt jo ä grosse Steuewärt im Menuplan i,
aber nach Mitternacht losch es de gschyder lo si.
Vom Turne här isch dr Juni wieder ä Hyt gsi,
mir stiege grad afangs Monet mit en nä Alass i.
Für d’Männerriege, dr Turnverein u dr DTV chli zäme z’bringe,
würdi viellicht äs Volleybauturnier ganz guet glinge.
Gesagt getan, afangs Juni si di drei Vereine zämecho,
u jedes het no grad öppis zum Brätle mitgnoh.
Vorab het me de äs Volleybauturnier gmacht,
bevor mir hei zäme öppis guets gässe z’Nacht.
Us aune dreine Vereine hets gmischti Mannschafte gäh,
u jedi hets wöue gäge di Angere ufnäh.
Aui Gruppe hei gäh ihres Bescht,
denn keini het wöue wärde letscht.
Z’Schönschte isch gsi aber für mi,
das aui viu Spass hei gha derbi.
Nach em Spiu näh aui zäme no ä feini Wurscht,
u natürlech ou öppis für ä Durscht.
So hei mir drei Vereine ä schöne Obe dörfe verbringe,
u i hoffe, das üs das ou z’nöchscht Johr wieder tuet glinge.
Das dr DTV a nes Turnfescht geit isch jo nid nöi,
hür heimers aber fertig brunge u si grad a zwöi.
Zersch simer uf Lyss a Seeländische gange,
dä Wunsch isch nämlech scho lang i üsne Köpf gstange.
Vorab ä härzleche Dank a üsi Kampfrichterinne,
denn ohni öich chönnti äs Turnfescht gar nid stattfinge.
Mit zwöufne Froue hei mir dä Wettkampf bestritte,
u jedi het bim angere mitglitte.
I de Allroundspieli u de Wurfdiszipline tüe mir üs mässe,
u tüe derbi ou z’Lache nid vergässe.
Aui si sech do grad einig gsi,
das muess nöchscht Johr ou wieder im Programm si.
Mir si de no chli bliebe ufem Feschtgeländ,
u so nimmt haut jede Alass sis Änd.
Ä Wuche speter si mer scho wieder zämecho,
nämlech für äs kantonale uf Solothurn z’go.
Mir hei beschlosse mit de öffentleche Verkehrsmittu z’go,
vorauem wägem parkiere u so.
Pünktlech si di Froue z’Messä, z’Aetige u z’Limpach stange,
u gmüetlech tüe si aui ufs Poschtouto plange.
Aber das Poschi het u het nid wöue cho,
so het me haut dr Fahrplan vüre gnoh.
Sofort gseht me do ä „R“ hingerdra, was söu das bedüte,
das isch jo ä Rufbus, mi hätt söue alüte.
So het me de kurzfrischtig Outo organisert,
wo di Froue uf Bätterkinde a Bahnhof führt.
Schlussändlech hei mir üs aber aui zäme z’Solothurn troffe,
u jedes isch pünktlech is Tenue gschloffe.
Gnue Zyt hei mir ou gha für üs z’konzentriere,
u gägesitig ä nanger z’motiviere.
Mit dr Liechtathletik isch äs de losgange,
nämlech d’Wurfdiszipline si uf em Programm stange.
Jedes git sis Beschte u tuet probiere,
siner Trainingsresultat chönne z’egalisiere.
Ar Glauser Christa isch ä super Clou glunge,
d’Kugele heisi fasch gar nümme gfunge.
Über nä Meter meh aus Trainingsresultat,
het si äch gnoh äs Dopingkonzentrat.
Z’nöchscht mou gö mir zersch i d’Manordrogerie,
u frese dert äs Säftli i.
Drufache simer zu de Allroundspieli ganz rasch,
denn äs isch nämlech scho äs Gwitter im Amarsch.
Mit 18 Froue simer i dä Wettkampf gstartet,
u do hei mir scho äs guets Resultat erwartet.
Leider isch de der Luft scho chli z’früh cho,
u di Bäu tue üs bim Beach haut zwüschinne ä Bode goh.
Schlussändlech chöi mir aber aui zfriede u froh,
gmüetlech i zwöit Teu übere go.
Dr Obe isch ou ganz schnäu verflosse,
mi het ne ou ungerschiedlech gnosse.
Di einte im Feschtzäut uf de Tische,
di angere entweder uf dr Butschoutobahn oder bim Glücksfische.
Am Sunndig druf wärde mir no empfange,
u aui si froh das die Turnfescht so guet si gange.
Ä krönende Abschluss isch das für aui gsi,
u mi kehrt de no hurti ir WM-Bar i.
Mi tuet no chli plagiere u usefinge,
wäm äch dr bescht Schnupfspruch würdi glingä.
I gloub am Hert Käthy sine tuet üs aune guet gfaue,
aber är tuet mir grad nümme ifaue.
Nachem strenge Juni tuet üs z’Leiterteam chli schone,
u üs mit Bädlä u Roller Blades belohne.
So hei mir üsi Summerferie i glüte,
wo für üs jo aui ou öppis bedüte.
Z’Jekami-Schiesse isch hür im Ouguscht,
uf das hei ou immer äs paar Froue Luscht.
Si si de nid nume guet im Schiesse, nenei
Si wei de ou nid grad sofort hei.
DTV-Reis isch ou im Ouguscht agseit,
di isch de nid öppe abverheit.
Bärble u z’Fränzi tüe üs uf di siebne am Morge uf ä Dorfplatz bsteue,
u über die zwe Täg, hani ganz viu z’verzeue.
Statt das mir z’Messe uf enes Poschi (wo de viellicht chunnt) tüe warte,
hei di zwo dänkt, mi chönnt doch z’Fuss afo starte.
So simer aui am Morge früh ganz guet glunet,
vo Messä gägä Bätterkinge zu gschunet.
Dert hets am Bahnhof gäh ä Kafipouse,
u für di wo wei ou öppis z’schnouse.
Witer mit em Zug, u när mit em Poschi uf Prés-d’Orvin,
wo mir de gmüetlech chöi äs Apero näh.
Drufache isch wieder ä Marsch agstange,
aber di meischte tüe scho ufs Mittag plange.
Äs Ablenkigsmannöver vom Fränzi, si tuet üs öppis über d’Ameisehüfe verzeue,
ungerdessi tuet dr Rösch Ruedi im Gjät us dr Grill ufsteue.
Im Freie us tuet üs dr Ruedi z’Fleisch grilliere,
u drzu tüe di zwo üs no äs Glesli Wy serviere.
Äbefaus feini Züpfe u Teigwarensalat,
isch für üs aui ou parat.
Ä schöni gmüetlechi Mittagspouse hei mir gha,
bevor mir z’Fuss wieder tüe witergha.
Di grossi Überraschig chunnt de ersch no,
wo mir de plötzlech bir Bison Ranch si acho.
Äs heimeligs Beizli liegt da vor üs, u mir chere grad i,
denn do hie chöi mir ou grad Zimmer bezieh.
Nach äre kurze Pouse geits de los,
is Forrest-Jump-Revier, das isch de grandios.
Leider isch de do z’Rägewätter cho,
aber das hei di Froue gar nid richtig wahr gnoh.
Nid chönne mitmache hani das wägem Bei,
Cornelia wägem Rügge, u z’Käthi wo nid isch ganz schwindufrei.
Mir si de di Froue go afüüre u ungerstütze,
ou we mir ihne vom Bode us nüt hei chönne nütze.
Aui hei das gnosse u si froh,
wo si tue heil am Bode wieder si acho.
Am Obe bim nä gmüetleche Zämesi,
chert de Müdigkeit bi de meischte i.
Di einte si de früh go liege,
u di angere hei mit Jasse no chli Zyt vertriebe.
Am Morge nach em nä feine z’Morgä,
macht üs z’Wätter scho wieder chli Sorgä.
Di Wanderig uf ä Chassral nämer du glich uf üs,
o we mir när hei chli nassi Füess.
Wägem Rägewätter müesse mir di planti Trottinetabfahrt verpasse,
u drum tüe mir im Chassralhotel haut chli jasse.
Mit äm Poschi geits de witer nach Nods,
u dert hei mir ä Stung Zyt für näs Apero.
Zufälligerwis hei di grad Dorffescht u dr Umzug foht grad a starte,
gseht grad so us, aus würdi di nume no uf üs warte.
Mir Froue tüe dert grad mitloufe schön gschlosse,
u dr Applaus hei mir natürlech aui ou gnosse.
Mir chönnti üs a dem Fescht no lang Zyt vertriebe,
aber mir chöi leider nümme länger bliebe.
Mir müsse gäge hei zue u dörfe am Obe no einisch i Usgang,
mir si no iglade bi de Hornusser am Empfang.
Ä chline Lapsus isch de no vorcho,
wo z’Poschi statt uf Messä gäge Bärn zu tut go.
Ä Zusatzfahrt über Zollikofe hei mir auso no gnosse,
u so hei mir üsi schöni Reis abgschlosse.
Äs grosses Merci für z’Fränzi u für Barbara,
das mir zäme so ne tolli Reis hei dörfe ha.
Im September si mir mit de Hornusser zäme cho,
für ir Johresmeisterschaft müglechscht wit z’schloh.
Ou we mir das jetz scho mängs Johr mache,
mi gseht gäng wieder unmüglechi Sache.
Im Septämber isch üs is turne cho bsueche Patricia,
i hoffe mir träffi seie nöchscht Johr wieder a.
Vom Herbscht bis i Frühling,
chöme wieder dra di chlinschte Ching.
Z’Muki u z’Kitu fot wieder a,
ganz viu Ching hei mer ou das Jahr.
Merci viu mou de Leiterinne , dass Dir öich di Zyt tüet näh,
u dene Ching ganz viu Fröid am Turne chöit gäh.
Ä grosse Betrag hets wieder im November gäh,
am Lottomatch vo de Ortsvereine tüe viu Lüt teil näh.
DTV-Froue hei ou do wieder Spass gha u viu chönne lache,
o wenn’s mängisch isch wäge de unmüglechschte Sache.
Im Dezämber isch ou wieder dr Chlausehöck agseit,
do het z’Wätter aber totau verseit.
Ä schöni Wanderig düre Waud wär planet gsi,
u aschliessend äs Fondue uf offenem Füür u chli Wi.
Zum Glück het do z’OK ä Auternative gha,
u das Speckfondue chunnt ou im Hornusserhüsli guet a.
Dr Eberhard Res, üse Koch u Unterhautigsma,
stimmt zwüschinne ou eis uf em Jagdhorn a.
Äbefaus siner Värsli u Witze chöme guet a,
mir hei ömu üser Büch vor Lache müesse ha.
Plötzlech hets gmacht klopf klopf u üs isch äs nümme so ghür,
denn dr Samichlaus u dr Schmutzli stöh vor dr Tür.
Si näh sofort z’grosse Buch führe,
u näh doch tatsächlech jedes vo üs düre.
Z’Käthy het ou no äs Värsli ufgseit,
u das entspricht scho chli dr Wahrheit.
Die Wort tüe mir üs grad z’Härze näh,
u probiere de nöchschts Johr wieder aues z’gäh.
Dr Chlaus u dr Schmutzli schwitze so fescht i ihrem Chleid,
u das tuet üs Froue aune zäme ganz leid.
Mir hei ihne z’Agebot gmacht sech demaskiere,
so heisi mit üs ou no chli chönne fiire.
Merci viu mou am OK, äs isch super gsi,
u i hoffe dir siget aui nöchscht Johr wieder derbi.
Achtung, wenn dr öppis nid wüsset tüet nech nid stresse,
dir finget dr DTV jetz ou unger www.turnen in messe.
Merci viu mou Marianne, wetti do drzu säge,
du hesch ganz viu Arbeit gha drwäge.
So, i bi jetz am Änd vo mim Bricht aglangt,
u das Johr het wieder viu vo öich verlangt.
Merci viu mou für öier unermüdleche Isätz,
dir sit aui zäme eifach Guldschätz.
Jetz wünsch i öich no ganz schöni Autjohrstäg,
u hoffe dir bliebit aui guet zwäg.
I fröie mi scho ufs nöchschte Zämecho,
u hoffe öich geit das ou äso.
Öii Präsidentin
Meja Neuenschwander