Nach hertem Uswahlverfahre (diversi Eignigsteschts und Liedvorträg) si mir am Samschtigmorge früeh ds`24.gischte höch am Bahnhof Bätterkinde gstange. Teu no chli müed angeri scho vou in Fahrt!

Im Zug uf Solothurn isch de itroffe was vieli befürchtet hei: üsi Reiseleitig, dsKäthy und d`Marianne, si mit grossem Programm gstartet und mir hei müesse Lösli zieh. Dadrus si 2 Fahne- und 2 Wyfläscheträgerinne erkore worde.

Oje, das faht ja guet a, het mängi dänkt u tatsächlech: Im Zug nach Neuhuse het üsi Reiseleitig, guet erkennbar am äxtra druckte T-Shirt („ich hab einen im Tee“) aues gäh!! Sehr professionell hei sie üs d`Notusgäng, ihri GmbH und ihri Hobbys vorgsteut. Mängi het Träne glachet über die zwo! Dr Reihe no het sich jetz jedi vo üs hurti müesse vorsteue....scho erstuunlech wie populär dä Name „Theres"isch... Sogar „Tee“ imene spezielle DTV-Thermos chrueg isch üs serviert worde -MEGA!!

In Neuhuse si mir de usgstiege und mit Blick ufe Riihfau bis zur Fähre gloffe. Scho gewaltig die Wassermängi wo da achechunnt! Ä churzi Fährefahrt het üs aschliessend zum Schloss Laufen verfrachtet, vo wo us mir nähr öpe 1 Stung nach Schaffhuse si gmarschiert.

Dert acho si teu no hurti zum Munot uche, hei ds uswändig glehrte Lied gsunge und zimisiert.

Am eis, chuum ufem Schiff Platz gno und dr Caramel wodka gläärt (Merci Theres!), hets afa rägne. D`Reiseleitig isch langsam närvös worde: cha die planti Wanderig vo Diessenhofen uf Stei am Riih statt finge?? Sie hei das Problem flexibu glöst und zwe Variante gmacht: ä Gruppe isch ca. 2h dür Waud und Wiese nach Stei am Rhii gloffe, die angere mit em Schiff witer u drfür de no chli is Städtli gah lädele.

Am Obe am sibni isch nächste gmeinsame Träffpunkt gsi: mir si zäme id Spaghetteria gah ässe. Mit guet gfüllte Büch si mir dür das wunderschöne Stei am Riih g`spaziert, hei ä Absacker gno u si de aui relativ früech ir Jugendherberge im Bett gläge. D`Nacht isch für es paari zimlech läng worde, hei sie doch müesse WC-Papier id Ohre stopfe und Morsezeiche ad Wand gäh...

Bi schönschtem Wätter hei mir am Sunntig morge üsi Mietvelos gsattlet und üs ufe Wäg nach Krüzlinge gmacht. Aus am Bodesee entlang, dür wunderschöni, pflegti Ortschafte si mir gueti 2 Stung dür Dütschland gradlet und hei in Rudolfszell ä Mittagspouse gmacht. Witer über Konstanz hei mir öpe 2 Stung später Krüzlinge erreicht, hei d`Velo abgäh und üs uf d Heireis gmacht.

„Liebe Fahrgäste, leider hat dieser Zug einen technischen Defekt und wir bitten sie deshalb, hier in Berg auszusteigen. In Kürze werden dann Ersatzbusse eintreffen. Danke.“ 

Ok....stiege mir haut hie, am A.... vor Wäut, us. Mir heis jedoch glasse gno, si chli ghöcklet, hei üses Bier vor herumtobende Ching beschützt(MerciKäthy) und ufe Bus gwartet. Dä isch jedoch nie itroffe drfür aber ä nöie Zug.

So si mir haut de ei Stund später aus planet, müed, z`friede und mit dr Reiseurkunde ir Hang ds`Bätterkinde i Ruefbus gstiege und zrügg i Buechibärg chauffiert worde.

Unbestritte isch das ä DTV-Reis vor Äxtraklass gsi; aui die Ideene und dä Isatz vom Käthy und dr Marianne, die fasch kompletti Teilnähmerinnezahl (schad heit dir nid chönne mitcho Meja und Pia), das mega Wätterglück und die super Stimmig ungernang wird gloub keni so schnäu vergässe und het üsem Verein ungloublech guet ta!

Merci viu,viu mau Marianne und Käthy, dir heit das super gmacht und trotz 22 Närvesagine nie dr Humor verlore.

I fröie mi scho uf die nöchsti DTV-Reis (gäu Susi und Sandra...)

Monika

(Fotos S.F.)